शरद पवारांमुळेच राज ठाकरेंचा आयोध्या दौरा ठरला अयशस्वी, मनसेचा हल्लाबोल
मुंबई – मनसेच्या अयोध्या दौऱ्याला विरोध करण्यासाठी महाराष्ट्रातून रसद पुरवण्यात आली असल्याचा आरोप मनसे अध्यक्ष राज ठाकरे यांनी पुण्यात पार पडलेल्या सभेत केला. दरम्यान, मनसे नेत्यांकडून राष्ट्रवादीचे अध्यक्ष शरद पवार आणि भाजप नेते बृजभूषण सिंह यांचा फोटो ट्विट करण्यात आला आहे. या फोटोमध्ये बृजभूषण आणि शरद पवार तसेच सुप्रिया सुळे एकत्र पाहायला मिळाले. त्यामुळे राज ठाकरेंच्या अयोध्या दौऱ्याला विरोध करण्यामागे शरद पवारांचा हात असल्याच्या चर्चेला उधाण आले आहे.
मनसे नेते गजानन काळे आणि सचिन मोरे यांनी बृजभूषण सिंह यांचा शरद पवार आणि सुप्रिया सुळेंसोबतचा फोटो ट्विट केला आहे. काळे यांनी ट्विटमध्ये लिहिले, हा फोटो मावळमधील एका कार्यक्रमातील आहे. सध्या या फोटोची चर्चा सर्वत्र असून यावरून आता राजकारण चांगलेच तापले आहे. अशातच मनसेचे प्रवक्ते योगेश चिले यांनी शरद पवारांवर ट्विट करत जहरी टीका केली आहे. महाराष्ट्र त्यांना यापुढेही भावी पंतप्रधान म्हणून हिणवत राहील अशा शब्दांमध्ये चिली यांनी ट्विट केले आहे.
योगेश चिले यांनी ट्विट केले आहे की,’एका मराठी माणसाला श्रीरामाचे दर्शन होऊ नये म्हणुन “षडयंत्र रचणारा” एक नास्तिक मराठी माणुस अवघ्या महाराष्ट्राने पाहीला… विश्वासार्हता नाही म्हणून पंतप्रधान बनता आलं नाही… महाराष्ट्राचे कायमचे भावी पंतप्रधान म्हणजे शरद पवार’. ते पुढे ट्विट करतात की,’पवारसाहेब… जाती जातीत वाद निर्माण कसा करतात, त्याचे हे उत्तम उदाहरण… म्हणुनच त्यांची विश्वासार्हता नाही… विश्वासार्हता नसल्यानेच ते पंतप्रधान बनु शकले नाहीत…’ असं म्हणत चिले यांनी शरद पवारांवर हल्लाबोल केला आहे.
पवारसाहेबांचा मला अभिमान – बृजभूषण
बृजभूषण यांनी या प्रकरणी म्हटले, शरद पवार हे मोठे नेते आहेत. मी कुस्तीचा राष्ट्रीय अध्यक्ष आहे, तर शरद पवार हे पदाधिकारी आणि संरक्षक आहेत. तीन वर्षांपूर्वीचा हा फोटो असून कुस्तीच्या क्षेत्रात माझ्यामुळे चांगले काम झाल्याची पवार यांची भावना आहे. पवार यांच्याशी चांगले संबंध असल्याचा आपल्याला अभिमान असून ते अयोध्येत आले तर आपण त्यांना प्रणाम करू, असे बृजभूषण यांनी मत व्यक्‍त केले.
