राज्यात आरोग्य सुविधेसाठी स्वतंत्र केडर नेमणार – राजेश टोपे

करोनासह साथीचे आजार, राष्ट्रीय व राज्य आरोग्य कार्यक्रम, नागरी व ग्रामीण आरोग्य तसेच वाढता असंसर्गजन्य आजारांचा पसारा यांचा विचार करून आरोग्य व्यवस्था बळकट करण्यासाठी राज्यस्तरावर आरोग्य विभागाची स्वतंत्र केडर तयार करण्यात येणार असल्याचे आरोग्यमंत्री राजेश टोपे यांनी सांगितले. तसेच दुर्गम आदिवासी भागात काम करणाऱ्या डॉक्टर व आरोग्य कर्मचाऱ्यांना पगाराव्यतिरिक्त कामावर आधारित विशेष प्रोत्साहन भत्ता दिला जाईल, असेही आरोग्यमंत्र्यांनी ‘लोकसत्ता’ला दिलेल्या मुलाखतीत सांगितले.

“राज्य लोकसेवा आयोगाच्या माध्यमातून ज्याप्रमाणे उपजिल्हाधिकारी, सहाय्यक पोलीस आयुक्त आदी केडर ( संवर्ग) निवडला जातो. त्याचप्रमाणे आगामी काळात आरोग्य विभागासाठी स्वतंत्र केडर तयार करून आरोग्य विभाग बळकट व प्रशासकीयदृष्ट्या सक्षम केला जाणार आहे. यासाठी राज्य शासनाने सुधीर ठाकरे यांच्या अध्यक्षतेखाली माजी आरोग्य महासंचालक डॉ सुभाष साळुंखे, संचालक डॉ अर्चना पाटील तसेच अन्य तज्ज्ञांची एक समिती नेमली होती. या समितीने आपला अहवाल सादर केला असून, त्यातील शिफारशीनुसार आरोग्य विभागाचे स्वतंत्र केडर तयार करण्यात येणार आहे. त्याशिवाय आरोग्य विभागासाठी यापुढे कालबद्ध पदोन्नती दिली जाणार असून, आरोग्य भवनातील अतिरिक्त संचालक, सहसंचालक, उपसंचालकांच्या वर्षानुवर्षे रखडलेल्या पदोन्नतीचा प्रश्न तातडीने सोडविला जाईल.”, असे आरोग्यमंत्री राजेश टोपे म्हणाले.