पिंपळे सौदागर : रोझ आयकॉन सोसायटीत कंपोस्ट खताचा दुसरा प्लांट सुरू

• उन्नती सोशल फाऊंडेशनच्या अध्यक्षा कुंदा भिसे यांच्या हस्ते उद्घाटन

पिंपरी (प्रतिनिधी) – झाडांचा जमिनीवर गळालेला पालापाचोळा, शेणखत आणि चहापत्ती यावर प्रक्रिया करून तयार होणाऱ्या कंपोस्ट खताच्या दुसऱ्या प्लांटचे पिंपळे सौदागरमधील रोझ आयकॉन सोसायटीत आज उदघाट्न करण्यात आले.

उन्नती सोशल फाउंडेशनच्या अध्यक्षा कुंदा भिसे यांनी सदर प्लांटला भेट देऊन या प्लांटविषयी माहिती घेतली. याप्रसंगी सामाजिक कार्यकर्ते संजय भिसे, सोसायटीचे चेअरमन रवी मुंढे, पंकज देशमुख, गौरव पाटील, संतोष कवडे, प्रसाद पाखरे, मोहित आगरवाल, शशिकांत शर्मा, विकास काटे, दिनेश काटे आदी मान्यवर उपस्थित होते.

या कंपोस्ट प्रकल्प प्लांटमध्ये झाडांचा पाळापाचोळा, शेणखत, चहापत्ती या नैसर्गिक गोष्टींचेच मिश्रण करून खत तयार केले जाते. याला शासनाचा टेस्टिंग रिपोर्ट देखील मिळाला आहे. हे खत सोसायट्यांच्या किंवा घरांच्या छतावर आपण जी फळबाग किंवा भाजीपाला वैगेरे तयार करतो त्यामध्ये हे खत वापरले जाते. तसेच शेतासाठी देखील हे खत फार उपयुक्त ठरते.

कंपोस्ट प्रकल्प प्लांटमुळे निसर्गाचा समतोल राखण्यास मदत होणार आहे. असे समाजोपयोगी उपक्रम सातत्याने राबविण्याची गरज आहे. घरातील आणि आपल्या आसपासच्या परिसरातील वेस्ट वाटणारा कचरा देखील आपल्या किती फायद्याचा आहे हे या प्लांटमुळे दिसून येते. भविष्यात अशाप्रकारचा प्लांट पिंपळे सौदागर परिसरातील सर्वच सोसायट्यांमध्ये व्हावा व हा उपक्रम राबविण्यासाठी जर काही मदत लागलीच तर उन्नती सोशल फाउंडेशन स्वतः पुढाकार घेईल व सहकार्य करेल, असे फाउंडेशनच्या अध्यक्षा कुंदा संजय भिसे यावेळी म्हणाल्या.