…अन्यथा रस्त्यावर उतरणार, नितेश राणेंचा मुख्यमंत्र्यांना इशारा

मुंबई – भाजपा आमदार नितेश राणे यांनी मुख्यमंत्री उद्धव ठाकरें यांच्याकडे मुंबईच्या महापौर किशोरी पेडणेकर यांची तक्रार केली आहे. राणे यांनी पत्राद्वारे ही तक्रार केली आहे. शहरातील दोन प्रमुख क्रीडा संकुलांचं खासगीकरण करण्याचा घाट महापौरांच्या निटवर्तीय अधिकाऱ्याने घातल्याचा आरोप त्यांनी पत्रामधून केला आहे. हे खासगीकरण थांबवण्यात यावे नाहीतर आपण रस्त्यावर उतरुन आंदोलन करु असा इशारा राणेंनी दिला आहे.

मुलुंडमधील ललित कला प्रतिष्ठान आणि अंधेरीमदील शहाजी राजे भोसले क्रीडा संकुलाच्या खासगीकरणाला नितेश राणेंनी विरोध केला आहे. यासंदर्भात एक पत्रच नितेश राणेंनी मुख्यमंत्र्यांना लिहिलं आहे. पत्रामध्ये शिवसेनाप्रमुख बाळासाहेब ठाकरेंचा उल्लेख करण्यात आला असून त्यांनीच मुंबईकरांना जलतरण आणि बाग यासारख्या सेवा मिळाव्यात म्हणून या सोयी उपलब्ध करुन दिल्या होत्या, असं म्हटलं आहे. बाळासाहेबांच्या राजकारणाचा केंद्रबिंदू कायमच मराठी माणूस होता. त्यांच्याकडे दूरदृष्टी होती. त्याच उद्देशाने सर्वसामान्यांना जलतरण तलाव, बाग यासारख्या सोयी मिळाव्यात म्हणून मुंबई कला प्रतिष्ठानची स्थापना केलेली. मात्र बाळासाहेबांनी स्थापन केलेलं हे प्रतिष्ठान आता भ्रष्टाचाराचं केंद्र झालं आहे, असा संताप सामन्य नागरिकांमध्ये व्यक्त होत असल्याचा उल्लेख पत्रात केला आहे.

या दोन्ही क्रीडा संकुलांचा कारभार हा पारदर्शक नसल्याचा आरोप नितेश राणेंनी पत्रातून केलाय. असं असतानाच महापौरांचे निकटवर्तीय अधिकारी असणाऱ्या देवेंद्रकुमार जैन यांच्या हस्तक्षेपाने या दोन्ही क्रीडा संकुलांच्या खासगीकरणाचा घाट घातला जात असल्याचा आरोप नितेश राणेंनी केलाय.