कर्नाटकातील बंगलोरमध्ये छत्रपती शिवाजी महाराजांच्या पुतळ्याची विटंबना, पुरोगामी विचारी संघटनांकडून पिंपरीत निदर्शने
पिंपरी (प्रतिनिधी) – कर्नाटकमधील बंगलोर येथे छत्रपती शिवाजी महाराज यांच्या प्रतिमेची विटंबना करण्यात आली. त्यातील समाजकंटकांचा आज शनिवारी (दि. 18) पिंपरीतील पुरोगामी व समविचारी संघटनांच्‍या वतीने डॉ. बाबासाहेब आंबेडकर चौकात तिव्र निदर्शने करण्यात आली.
“महाराष्ट्राच्या निर्मितीपासूनच कर्नाटकमधील जनतेने व सरकारांनी सतत महाराष्ट्राचा तिरस्कार केलेला आहे. या तिरस्काराचा एक भाग म्हणून महाराष्ट्राचे आराध्य दैवत छत्रपती शिवरायांच्या प्रतिमेची विटंबना कर्नाटकमधील काही समाजकंटकांनी केलेली आहे. कर्नाटकमधील भाजप सरकारचाही या समाजकंटकांच्या कृत्याला पाठिंबा असल्याची शक्यता आहे. त्यामुळे महाराष्ट्राचे मुख्यमंत्री उध्दव ठाकरे यांनी यासंदर्भात देशाचे पंतप्रधान नरेंद्र मोदी आणि गृहमंत्री अमित शहा यांना पत्र लिहून कर्नाटक सरकारचा आणि या घटनेचा निषेध व्यक्त करून संबंधितांवर कारवाई करण्याचे आदेश कर्नाटक सरकारला द्यावेत”, अशी मागणी करावी, असे आवाहन माजी नगरसेवक मारुती भापकर यांनी केले.
मानव कांबळे म्हणाले की “हे हिंदुत्ववाद्यांचे षडयंत्र असून छत्रपती शिवाजी महाराजांनी सर्वधर्मसमभावाचे राजकारण केले, त्यांच्या या राजकारणाला विरोध करणारी भूमिका भारतीय जनता पक्षाची असल्यामुळे, छत्रपती शिवाजी महाराजांचा अवमान करणाऱ्यांना पाठबळ देण्याचे कृत्य कर्नाटक मधील भाजप सरकार करत आहे, हे षड्यंत्र महाराष्ट्रातील शिवराय, फुले, शाहू, आंबेडकर यांच्या विचारांच्या अनुयायांनी व्यवस्थितपणे समजावून घेऊन, अशा प्रवृत्ती भविष्यामध्ये ठेचून काढण्यासाठी संघटित प्रयत्न केले पाहिजेत. या देशाची लोकशाही, अखंडत्व व सार्वभौमत्व अबाधित ठेवायचे असेल तर अशा धार्मिक भावना भडकावण्याचा प्रयत्न करणाऱ्या राजकीय पक्षांना भविष्यात सत्तेपासून रोखणे ही पुरोगामी व प्रागतिक पक्ष व संघटनांची प्राथमिकता असली पाहिजे”.
या आंदोलनामध्ये प्रकाश जाधव, काशीनाथ नखाते, सतिश काळे, धनाजी येळकर पाटील, लक्ष्मण रानवडे, जिवन बोराडे, अजीज शेख, दत्ता शिंदे, सागर तापकीर, गणेश सरकटे, सचिन काळभोर, विक्रम पवार, माऊली बोराटे, अनिल राठोड, महेश पंडित, उमेश थोरात, संगमनेश्वर साबळे, गणेश तुरुकमारे, प्रल्हाद कांबळे, धम्मराज साळवी, संतोष शिंदे, मेघा आठवले यांच्या सह असंख्य कार्यकर्ते उपस्थित होते.
